親子手工藝班 ／ 睇戲劇

30 Jul 13 早於六月， 一早同 Isaac 報左防止虐待兒童會搞既親子班， 30元兩朝既班， 抵到爛。第一班係親子手工藝， 第二班係親子美食製作。當係暑假節目都抵吖。

晨早， 我地趕頭趕命咁出發去玩， 一開始， 導師比大家選畫紙， 呢款係 Isaac 選的。媽媽心諗：下， 咁難度高既？？？ 因為係做立體相架， 呢幅畫無乜公仔， 點剪立體好呢～～～～
Isaac: 等我諗下點整好先
因為 Isaac 年紀仲係細， 雖然佢滿腔熱誠要剪， 不過呢， 佢小肌肉仲未發展得好好， 剪多兩野都剪爛左咁細線條既圖案， 佢就放棄左， 仲係咁發脾氣， 唔比媽媽剪， 仲整皺哂D圖案。媽媽都唔得閒理佢， 因為得一對手剪， 人地兩對手加埋人地圖案都係好大既公仔， 好快剪到幅畫出黎～～～～～

幾經辛苦， 卒之剪好貼好哂， 圍埋個相架框， 比 Isaac 出馬了。一到佢出馬， 就心情好好多， 因為唔駛悶足個幾鐘。 搓緊佢最愛既輕秥土。仲猛咁叫媽媽一陣幫佢去買～～好在導師話屯門無呢隻買既姐， 唔係媽媽真係好唔得閒。因為完左呢度， 我地仲要趕住去學野～～～
好用心去做勞作既Isaac
嘩， 好SHARP呀， 溝色佢都諗到～～當然， 咁有規則既溝， 係媽媽從旁控制架啦， 否則我估會又紫又王王王紫紫王咁亂哂。
 好專心咁開緊一包珠仔， 又係 Isaac 最愛的。所以呢D小道具， 屋企常有存貨。

影相影唔到點立體， 不過大家見唔見到有兩個 Isaac 呢？ 有人發脾氣要貼多個自己， 但又發脾氣唔比媽媽貼爸爸媽媽妹妹 (趕住走喎～～～）， 媽媽無啋佢， 照貼哂家庭成員落去。咁至似返個親子相架架嘛。


做完相架， 即拎住走去隔離上堂。途經有個女人見到個相架， 大叫好靚， Isaac 心情似乎即刻開心返少少～～～無計， 悶左咁耐又剪乜都爛， 媽媽都好明個種挫敗感既。

唔緊要， 好在媽媽安排左課後， JOIN同學仔食LUNCH。

之後， 仲一齊排隊睇免費既戲劇。話時話， 呢套戲劇， 好似唔係好岩幼兒小朋友去睇， 現場不知幾多喊聲。包括相中的女同學芝芝都嚇到喊。全場喊聲不絕。唯有怪責女演員把聲太迫真， 搞到個個小朋友都以為真係有怪獸～～～

睇完戲劇， 各有各散， Isaac 就同散剩既千攸去左反斗城探玩具。Isaac 好照顧千攸架， 成日叫佢過黎吖～～～要SHOW玩具比千攸睇， 可惜呢， 叫親千攸黎睇既， 都係男仔玩意黎。真係傻豬黎， 自己萬分之鐘意既， 就以為女同學都一樣鐘意。

好在， 最後都有同學仔肯陪 Isaac 癲， 扮怪獸姐。
玩下玩下， 呢日， 由朝陪到傍晚， 都係陪 Isaac 四處玩， Isaac 真係好開心。不過就悶死屋企個位妹妹了。